Rosnicat, ky gatim traditional dhe karakteristik i disa rajoneve të vendit ka sekretet e veta. Zbuloni pak histori të gatimit të kësaj pjate në zona të ndryshme, si Vlora, Përmeti. Por edhe sekretet e këtij gatimi nga Dhurata Thanasi administratore e “Luga e Argjendtë”. Ja çfarë shkruan ajo:
“Rosnicat janë një gatim traditional dhe karakteristik më së shumti për rajonin e Shqipërisë Juglindore dhe Jugperëndimore.

Mendohet që pjata e rosnicave gatuhej kur një mik apo i afërm vizitonte papritur familjen dhe e zonja e shtëpisë përdorte përbërës që i gjendeshin në sirtarët e dollapit të ushqimeve, si dhe gjënë e gjallë që ndodhej në haure e kotecë. Rajone si Vlora, Fieri etj., përgatisnin rosnicat me miell të egër, vezë të rrahur, kripë dhe aromatizonin me nenexhik të thatë ose sherebelë. Disa rajone të tjera si Korça, Erseka apo Përmeti përdorin vetëm vezë dhe kripë.

Por kalimi më i rëndësishëm është përdorimi i rosnicave në lëngun me zog pule, që siç thuhet, bën një supë të shkëlqyer dhe të shijshme. Konsiderohet si një pjatë e “familjes së varfër”, sepse “një zog i vogël pule mund të ushqejë shumë gojë!”. Disa fshatra në Vlorë, si Radhima, Fushë Dukat etj, shtojnë në rosnica dhe lëng limoni dhe e aromatizojnë me piper të zi.

Unë e kam tharë lëngun e rosnicave për disa minuta në furrë dhe i kam spërkatur me arra të pjekura dhe vaj ulliri ekstra të virgjër. Mielli që kam përdorur ishte me të vërtetë i ashpër dhe të kujton një shije shumë të lashtë. Kjo gjellë tradicionale shqiptare është unike dhe duhet të përdoret shpesh sidomos në periudhën e dimrit,” – shprehet Dhurata Thanasi, administratore e “Luga e Argjendtë”.
Foto: Luga e Argjendtë